---

Agla Adhyay – Ek Naya Padaav ❤️

Kah kar khud ko ek baat — chal padi hoon aage,

Bah kar paani mein — dhal padi hoon aage.

Ab na ho tum, na hoon main,

Raasta badal, chal pade hain aage.

Rishton ki dor ne aisa uljhaya —

Suljhane mein zindagi badal gayi.

Tapish ki aag mein jalte the jo hum,

Aaj usi tapish se door chale gaye hum.

Peechhe mudkar jab dekhoon khud ko,

Lagti thi vo ek nadaani —

Jismein basti thi meri duniya saari.

Ek din toot gayi vo duniya,

Bikhar gaya sab kuch.

Paana kya chahte the?

Haath laga kuch.

Sapne bade unche the —

Use paana zid thi meri,

Par nahi pata tha, ismein masoomiyat thi meri.

Par humein kya pata —

Tapish ki jis aag mein jal rahe the hum,

Jalaake khud mujhko —

Kahan chale gaye tum?

Aankhon mein nami liye,

Honthon par liye muskuraahat,

Suni maine kisiki aahat.

Thi vo zindagi ki ek kiran,

Jisne bana diya tha mujhe ek hiran.

Dari hui, sahmi hui —

Pata nahi tha, ab aage kya?

Khokhle dil ko liye chal padi main,

Zindagi lag rahi thi ek jang ka maidan —

Roz ek nayi chunauti, ek naya paydaan.

Tha apno ka haath — par kabhi na tha unka saath.

Chal padi hoon bas ek nayi raah par —

Ab na kuch khone ka dar, na kuch paane ka fikr.

Ab sochti hoon ek baat...

Kya hoga agla adhyay —

Ek naya padaav.

---

#ResilienceRising      #EmbraceTheMess     #PoetryOfHealing     #UnfilteredYou     #DilSe